«Քաղաքական իրավիճակից է կախված վերջնական որոշումը՝ մենք ընտրություններին կմասնակցենք առանձին, թե՞ դաշինքով»,- այսօր լրագրողների հետ հանդիպման ժամանակ ասաց ՀՀԿ փոխնախագահ Գալուստ Սահակյանը:

 Նա ավելացրեց նաև, որ հնարավոր է ՀՀԿ–ն առաջիկա խորհրդարանական ընտրություններին մասնակցի միայնակ։ Ըստ Գալուստ Սահակյանի Հայաստանի հաջորդ խորհրդարանում, ներկայացված կլինեն այն ուժերը, որոնք այսօր էլ կան, այսինքն խորհրդարանական ուժերի ներկա դասավորությունը կպահպանվի նաև հաջորդ խորհրդարանում։

«Ես, կարծում եմ, որ առաջիկա ընտրություններում ԲՀԿ–ն նորից կմնա որպես քաղաքական երկրորդ ուժ»,- ասաց Սահակյանը: Իսկ այն հարցին թե արդյո՞ք «Ժառանգությունը» կրկին խորհրդարան կմտնի, թե ոչ՝ բանախոսը դժվարացավ կանխատեսել: Գալուստ Սահակյանը վստահ է, որ խորհրդարանում կրկին առաջատար է լինելու ՀՀԿ-ն։ Նա նաև հայտարարեց, թե ժամանակավրեպ է նախկինում հնչեցրած իր այն տեսակետը, թե ընտրություններին առանձին մասնակցելու դեպքում ՀՀՇ–ն կարող էր հայտնվել խորհրդարանում։ Ըստ նրա՝ այսօր խորհրդարան մտնելու հնարավորություն չունեն ոչ ՀՀՇ-ն, ոչ ՀԱԿ-ը: