Իրանի նախագահ Մահմուդ Ահմադինեջադը, գերմանական Օբերհաուզեն քաղաքի օկեանարիումում բնակվող "ֆուտբոլային գուշակ", ութոտնուկ Պաուլին անվանել է' արևմտյան հասարակության "նեխման և անկման" խորհրդանիշ:

  Անցյալ կիրակի, Թեհրանում ելույթի ժամանակ Ահմադինեջադը մի քանի անգամ հիշատակել է ութոտնուկ Պաուլի անունը, հատկապես անվանելով նրան' "արևմտյան քարոզչության և նախապաշարմունքների" տարածող: "Նրանք, ովքեր հավատում են նման բաների, չեն կարող տանել իրենց ժողովուրդներին առաջ այնպես, ինչպես դա անում է Իրանը, որն անընդհատ ձգտում է ինքնակատարելագործման և հենվում է իրական հոգևոր արժեքների վրա",- հայտարարել Է Իրանի նախագահը:

  Ավելի վաղ, ութոտնուկ Պաուլի շուրջ, սնհավատության համար քննադատական խոսքեր էր ասել իսրայելական Շոհամ քաղաքի րաբբունի' Դավիդ Ստամը: Նրա խոսքերով, ուշադրությունը ութոտնուկի և այլ կենդանիների գուշակությունների նկատմամբ, դա "արևմուտքի բարոյական սնանկությունն է":