ԱԺ անկուսակցական պատգամավոր Հակոբ Գառնիկի Հակոբյանը առաջիկա խորհրդարանական ընտրություններին կրկին մեծամասնականով առաջադրելու է իր թեկնածությունը: Այս մասին նա հայտնեց Slaq.am-ի հետ զրույցում:

Նշենք, որ Հակոբ Հակոբյանը մեծամասնականով պատգամավոր է ընտրվել թիվ 41 ընտրատարածքից (Ք.Իջեւան, ք.Դիլիջան, ք.Բերդ, Թեղուտ, Հաղարծին, Գոշ, Աղավնավանք, Խաչարձան, Հովք, Գանձաքար, Այգեձոր, Արծվաբերդ, Իծաքար, Նորաշեն, Չինարի, Չորաթան, Վերին Կարմիր աղբյուր, Չինչին, Նավուր):

-Չնայած շատ ու շատ խոսակցություններին, ես հստակ որոշել եմ, որ անպայման առաջադրելու եմ իմ թեկնածությունը նույն իմ ընտրատարածքում, որտեղից ինձ ժողովուրդն է ընտրել:

-Իսկ տեղյա՞կ եք, թե նույն ընտրատարածքում ովքեր են պատրաստվում առաջադրել իրենց թեկնածությունը:

-Ճիշտն ասած, դա ինձ այնքան էլ չի հետաքրքրում: Կգա ժամանակը, կառաջադրվեն` կտեսնենք:

-Գուցե չեք հետաքրքրվում Ձեր մրցակիցներով, որովհետև վստահ եք, որ հաղթելու՞ եք:

-Ես ժողովրդի փոխարեն չեմ կարող ասել, բայց մի բան հստակ է, որ այս 5 տարիների ընթացքում մշտական կապ եմ ունեցել իմ ընտրողների հետ, և իրենք պիտի որոշեն` կցանկանա՞ն իմ նման պատգամավոր ունենալ, թե՞ ոչ:

-Խոսակցություններ են շրջանառվում, որ խորհրդարանական ընտրություններում Ձեզ սատարելու է «Օրինաց երկիր» կուսակցությունը, որքանո՞վ են այդ լուրերը համապաստխանում իրականությանը:

-ՕԵԿ-ն է՞ Ձեզ ասել, որ սատարելու է... Ճիշտն ասած, ես այս պահին չգիտեմ, թե քաղաքական ուժերից ինձ ով է սատարում, բայց մի բան հստակ գիտեմ` ինձ 41 ընտրատարածքի ժողովուրդը հաստատ սատարելու է:

-Այսինքն` որևէ կուսակցության հետ չե՞ք պատրաստվում համագործակցել:

-Բնականաբար, այն կուսակցությունը, որն իմ դեմ իր թեկնածուին չի առաջադրի, նրա հետ էլ կարելի է համագործակցել:

-ՀՀ նախագահ Սերժ Սարգսյանը բազմիցս նշել է, որ հաջորդ խորհդրարանում գործարար պատգամավորներ չպետք է լինեն: Հայտնի է, որ Դուք «Կիլիկիա» գարեջրի գործարանի սեփականատերն եք, արդյո՞ք Ձեզ չի կաշկանդում այդ փաստը և ընդհանրապես որքանո՞վ ճիշտ եք համարում ԱԺ-ում գործարար պատգամավորների ներկայությունը:

-Ճիշտն ասած, այն, որ գործարարները չեն կարող առաջադրվել խորհրդարանական ընտրություններում, ես այդ մտքի հետ այնքան էլ համամիտ չեմ, որովհետև ես էլ եմ համարվում ՀՀ քաղաքացի, Դուք էլ: Ես մեղավոր չեմ, որ գործարար եմ, բայց քանի որ գործող օրենքը թույլ չի տալիս, որ պատգամավորը գործարարությամբ զբաղվի, ես սեփականատեր եմ, բայց գործարարությամբ չեմ զբաղվում: Ունեմ գործընկեր, ով զբաղվում և կառավարում է մեր բիզնեսը և ես շատ գոհ եմ:

Ես բավանին ազատ ժամանակ ունեմ իմ օրվա 95%-ը զբաղվում եմ պատգամավորական գործունեությամբ և շատ հաճույքով եմ դա կատարում, մտադրություն չունեմ չառաջադրվելու, պետք է առաջադրվեմ և նպաստեմ, որ մեր երկրում ընդունվեն օրենքներ և մեր երկիրն առաջ գնա:

-Հայտնի է, որ խորհդրարանում ներկայացված կուսակցությունները` «Ժառանգությունը», ՀՅԴ-ն և «Բարգավաճ Հայաստանը» կողմ են 100%-անոց համամասնական ընտրակարգին անցնելուն, որպես մեծամասնականով ընտրված պատգամավոր, Դու՞ք ինչ կարծիքի եք:

-Ճիշտ է` այսօր շատ մարդիկ գործարարներին վատ աչքով են նայում, բայց ես այն քիչ պատգամավորներից եմ, ով մշտապես մասնակցում է ԱԺ նիստերին և տնտեսական հարցերի հանձնաժողովի նիստերին: Ինչ վերաբերում է 100%-անոց համամասնական ընտրակարգին անցնելուն, ապա այդտեղ ճիշտ ու սխալի հարց չկա: Իմ կարծիքով, դա կարելի էր առաջարկել այն ժամանակ, երբ մենք քննարկում էինք «Ընտրական օրենսգիրքը», պետք է ակտիվ մասնակցեին այդ քննարկումներին, ինչպես ես եմ մասնակցել և փորձեին իրենց կարծիքը պարտադրել մյուս պատգամավորներին: Այս պահին, եթե բոլորն էլ ուզենան անցնել 100%-անոց համամասնական ընտրակարգին, ժամանակն էլ թույլ չի տա: Իսկ թե ինչի համար է դա արվում, չեմ կարող ասել:

-Այսինքն` իմաստ չե՞ք տեսնում 100%-անոց համամասնական ընտրակարգին անցնելու, թե՞ պարզապես ուշացած եք համարում առաջարկը:

-Ես չեմ ասում, որ իմաստ չկա: Կոնկրետ ինձ համար նշանակություն չունի` համամասնական է, թե մեծամասնական: Պատգամավորը պիտի պատգամավոր լինի. այսինքն` նա պետք է ընտրողների հետ լինի: Ի՞նչ կապ ունի, թե նա որ ընտրակարգով է ընտրվել, թող գան` աշխատեն: Թող գա մեկը տեսնի, թե ես եմ ակտիվ նիստերին մասնակցել, թե՞ նույն այդ կուսակցությունների պատգամավորները: Ի՞նչ են ստից բաներ խոսում: Կարևորը պատգամավորը գրագետ լինի, օրենքներ ընդունի:

- Պարզապես, նույն ՀՅԴ-ի և «Ժառանգություն» կուսակցության ներկայացուցիչների կարծիքով` մեծամասնական կարգով ընտրությունների ժամանակ համատարած ընտրակեղծիքներ են լինում:

-Ես իմ փոխարեն կարող եմ պատասխան տալ, ճիշտն ասած, ինձ էլ էին մեղադրում ընտրակեղծիքներ բաժանելու մեջ, բնականաբար նման արտահայտություն անողն իր պատասխանը կստանա, բայց ես հայտարարում եմ, որ իմ ընտրատարածքում 2007-ի ԱԺ ընտրությունների ժամանակ որևէ խախտում չի եղել և որևէ մեկը ընտրակաշառք չի բաժանել` այդ թվում նաև ես: Հիմա էլ մտադրված չեմ ընտրակաշառք բաժանել: Այս 5 տարվա ընթացքում ես շատ-շատ` մազերիս չափ բարեգործություններ եմ արել, իսկ քարոզարշավի ընթացքում ես ժողովրդին կխնդրեմ, որ ինձնից որևէ բան չսպասի, որպեսզի իմ օգնությունը որպես ընտրակաշառք չդիտվի:

Շատ են խոսում, որ մեծամասնականով ընտրված պատգամավորներն օլիգարխ են, ես իմ գլխի տերն եմ, օլիգարխ չեմ, իմ քրտինքով կայացած մարդ եմ:

Լուսինե Հովհաննիսյան