Դեռևս 2011 թվականի փետրվար ամսին մի խումբ մտավորականների, գիտնականների և գործարարների աջակցությամբ ստեղծվել է նախաձեռնող խումբ, որը հանդես է եկել նման համալիր կառուցելու առաջարկով: Նախագծի հեղինակները նախատեսում են այն կառուցել աստվածաշնչյան Նոյան Տապանի իրական չափերով, բնական նյութերից և այնտեղ տեղադրել Տապանի մարդկային ու կենդանական կազմի կրկնօրինակները, մարդկային կյանքին վերաբերող պատմական ու հնադարյան մասունքներ, փաստաթղթեր, արխիվներ, աշխարհի բոլոր պետությունների դրոշներն ու զինանշանները, թանգարան, սրճարան, հյուրանոց և այլն:

Նախաձեռնողներն առաջարկում են համալիրը կառուցել Երևանի «Հաղթանակ» զբոսայգու բարձունքում գտնվող անմշակ, չօգտագործվող տարածքում՝ Արարատ լեռան դիմաց` համոզված լինելով, որ համալիրն իր եզակիությամբ կնպաստի զբոսաշրջության զարգացմանը հանրապետությունում` դառնալով Արարատ լեռան դիտակետը:

Նախաձեռնող խմբի կազմում են ՍՍՀՄ և ՀՀ ժողովրդական դերասան Սոս Սարգսյանը, բանաստեղծ Արամայիս Սահակյանը, գրող, հրապարակախոս Մերուժան Տեր-Գուլանյանը, ՀՀ ժողովրդական նարիչ, քանդակագործ Լևոն Թոքմաջյանը, ՀՀ նկարիչների միության նախագահ Կարեն Աղամյանը, «Հաղթանակ» զբոսայգու տնօրեն, գործարար Թորոս Ումրիկյանը, «ԱՐՄԱՐԵ» ընկերության նախագահ, համալիրի կառուցման նախագծի հեղինակ, իրականացնող և գլխավոր պատասխանատու Մարտուն Հարությունյանը:

«Նոյան Տապան» պատմամշակութային գիտակրթական համալիրի կառուցման նախնական աշխատանքների համար հիմնական ներդրողների կողմից արդեն գոյացել է 3 միլիոն ԱՄՆ դոլար, ինչը խիստ նախնական գումար է նման լուրջ կառույցի համար: Ծրագրի պատասխանատուները նշեցին, որ նախագծի իրականացման համար ընդհանուր առմամբ անհրաժեշտ է մոտ 20 միլիոն ԱՄՆ դոլար:

ՀԽ մշակույթի ենթահանձնաժողովի անդամներն, ընդհանուր առմամբ դեմ չլինելով նախագծի գաղափարին, միաժամանակ որոշ հարցեր բարձրացրին` կապված համալիրի կառուցման վայրի, սոցիալական ներկա վիճակում նման թանկ նախագծի ստեղծման հրատապության, ֆինանսական ռեսուրսների հայթայթման, այն զուտ բիզնես շահին ծառայեցնելու մտավախության և այլ հարցերի հետ: Գրեթե միաձայն որոշվեց նախագիծը քննարկել նաև Հանրային խորհրդի մեծ նիստի ժամանակ, ապա ծրագրի վերաբերյալ վերջնական եզրակացություն տալ:

hayernaysor.am