ԱՄՆ պետքարտուղարը Մյունխենի անվտանգության հարցերով 48-րդ համաժողովի շրջանակներում հանդիպումներ է ունենալու Հայաստանի արտգործնախարար Էդվարդ Նալբանդյանի և Ադրբեջանի նախագահ Իլհամ Ալիևի հետ: Ինչպես տեղեկանում ենք պետքարտուղարության պաշտոնական կայքէջից, Հիլարի Քլինթոնի երկկողմ հանդիպումների մասին այսօր հայտնել է գերատեսչության պաշտոնական ներկայացուցիչը:

Մեկնաբանելով հանդիպմանը նախատեսված հարցերը, պաշտոնական ներկայացուցիչը նշել է, թե քննարկվելու է Լեռնային Ղարաբաղի հակամարտության առաջընթացը: «Հակամարտության շուրջ բավականաչափ աշխատանք է տարվում, որում մենք մեծապես ներգրավված ենք: Պետքարտուղար Քլինթոնը անձնական հետաքրքրություն է ցուցաբերում այս հարցին»,-ասել է ամերիկացի դիվանագետը՝ հիշատակելով նաև Ռուսաստանի նախագահի միջնորդությամբ վերջերս Սոչիում կայացած գագաթնաժողովը:

Պետքարտուղարության ներկայացուցչի խոսքով, Քլինթոնը ցանկանում է զրուցել այդ հանդիպման արդյունքների և դրան հաջորդած զարգացումների շուրջ: