BBC-ի տեղեկացմամբ, բրիտանացի գիտնականները պարզել են, որ քիչ կրթություն ստացած մարդիկ ավելի շուտ են ծերանում, քան բարձրագույն կրթություն ստացածները: Առողջության և սոցիալական դիրքի միջեւ առկա կապը վաղուց է հայտնի. ավելի աղքատ մարդիկ միջինում ավելի շատ են ծխում, քիչ են զբաղվում սպորտով և հազվադեպ են դիմում բժշկի։
Սակայն Լոնդոնի Համալսարանական քոլեջի մասնագետների կատարած հետազոտությունը ցույց է տվել, որ կրթական մակարդակը ազդում է մարդու առողջության վրա ավելի շատ, քան կենսամակարդակը կամ հասարակական դիրքը։ Գիտնականները ենթադրում են, որ կրթված մարդիկ հակված են ավելի ճիշտ որոշումներ ընդունելու իրենց վարքի եւ կենսակերպի վերաբերյալ։
Բացառված չէ նաեւ, որ կրթված մարդիկ ավելի քիչ են սթրեսներ տանում եւ ավելի հեշտ են հաղթահարում դրանք։ Հետազոտողները արյան նմուշներ են վերցրել 53-75 տարեկան 400 մարդկանցից։ Այնուհետև չափել են քրոմոսոմների ծայրերին գտնվող թելոմերների երկարությունը. ինչքան կարճ են թելոմերները, այդքան շուտ է մարդը ծերանում։ Կրթական ցածր մակարդակով մարդիկ ունեին ավելի կարճ թելոմերներ։ Հետևաբար նրանք ավելի շուտ են ծերանում: