18:01:02 3°C
  • USD - 482.28 ֏
  • EUR - 568.13 ֏
  • RUB - 6.53 ֏
  • Նոր վարկային համաձայնագիր. Երեւանը ձեռք կբերի 100 հատ 12 մետրանոց նոր ավտոբուսներ

    13:36 28 Հոկտեմբեր 2021

    Կառավարությունն իր այսօրվա՝ հոկտեմբերի 28-ի նիստում հավանություն տվեց Հայաստանի Հանրապետության, «Երևանի ավտոբուս» փակ բաժնետիրական ընկերության և Վերակառուցման և զարգացման եվրոպական բանկի միջև «Երևանի ավտոբուսների ծրագիր» դրամաշնորհային համաձայնագրի ստորագրման առաջարկությանը:

    Հարցը ներկայացրեց ՏԿԵ նախարար Գնել Սանոսյանը՝ նշելով, որ «Դաբլյու Վայ Ջի Ինթերնեյշնլ Լիմիթիդ» խորհրդատվական ընկերության կողմից մշակվել և Երևանի քաղաքապետարանին է տրամադրվել Երևան քաղաքի հանրային տրանսպորտի նոր երթուղային ցանցը, համաձայն որի երթուղային ցանցի սպասարկման համար անհրաժեշտ է ձեռք բերել 845 հատ տարբեր չափսի ավտոբուսներ:

    Նոր տրանսպորտային ցանցի շարժակազմերի ներդրման ֆինանսական աջակցության հնարավորության հարցը Երևանի քաղաքապետարանը դեռևս 2019թ. գարնանը քննարկել է Վերակառուցման և զարգացման եվրոպական բանկի (այսուհետ՝ ՎԶԵԲ) հետ, որն իր պատրաստակամությունն է հայտնել աջակցելու ավտոբուսների ձեռքբերմանը՝ համապատասխան սուվերեն վարկային պայմանագրի շրջանակներում:

    Նախնական գնահատմամբ ավտոբուսների ընդհանուր քանակի ձեռքբերման համար անհրաժեշտ կլինի 120-150 մլն եվրո:

    Ըստ այդմ, առաջին փուլի ֆինանսավորումը կազմում է 25 մլն եվրո, որից 20 մլն եվրո վարկ է ՎԶԵԲ-ից և 5 մլն եվրոն՝ դրամաշնորհ:

    Խոսքը 100 հատ 12 մետրանոց ավտոբուսների ձեռքբերման մասին է. կոչվում են ցածրահատակ ավտոբուսներ, որոնք բավական լավ հարմարեցված են բոլորի համար:

    Երևանի քաղաքապետարանը տրանսպորտային բարեփոխումների ծրագրի առաջին փուլի շրջանակներում 2021 թվականի փետրվարի 1-ին հայտարարել է նախնական գնման (Advanced Procurement) երկփուլային մրցույթ՝ 100 սեղմված բնական գազով շահագործվող 12 մետրանոց ցածրահատակ ավտոբուսների ձեռքբերման նպատակով:

    Մրցութային հայտերի հանձնման վերջնաժամկետը  սահմանված է եղել 2021 թվականի մարտի 31-ը: Ներկայումս ստացված առաջարկները գտնվում են գնահատման փուլում:

    «Կարող ենք ասել, որ սա կառավարության հերթական խոշոր աջակցությունն է Երեւան համայնքին, որպեսզի կարողանա ամբողջովին նոր ավտոբուսներով երթուղային նոր ցանց ունենա»,-ասաց Սանոսյանը:

    ԿԱՅՔԻ ՀԻՆ ՏԱՐԲԵՐԱԿ

    Լրահոս