ՀՀ նախագահը մասնակցել է Շոլցի աշխատանքային ճաշին
Մեղրի քաղաքին կտրվի «ԱՊՀ մշակութային մայրաքաղաքի» պատվավոր կարգավիճակ
Ռազմական գնումները, որոնք պարբերաբար ներկայացվում են, խիստ խոցելի են դարձնում պաշտպանական համակարգը
«Իրավունք». Դա է պատճառը, որ ՔՊ-ականներն աջ ու ձախ «դուխով» պախարակում են շարժման անդամներին
«Փաստ». Է՞լ ովքեր են «հերթում». Փաշինյանի ականջները «կաթիլ-կաթիլ լցնում են», որ նա, միևնույնն է, «սվոյ» չէ
«Փաստ». Ռուսաստանաբնակ էլիտայի ներկայացուցիչների հետ կապված երկու արարողություն «Դվինում»
«Հրապարակ». Վարույթ է հարուցվել բուհի դեմ. կասկածելի բան է տեղի ունեցել
«Ժողովուրդ». Սպիտակցի Հայկոյի որդին շարունակում է մեղադրյալի կարգավիճակում մնալ. պաշտպանների միջնորդությունը մերժվել է
«Ժողովուրդ». Աթենք ՍՊԸ-ն կրկին դատական քաշքշուկի մեջ է. ո՞ր մարմնի դեմ է ընկերությունը հայտ ներկայացրել
«Փաստ». Դոն Պիպոն Մոսկվայում ցուցահանդես է բացել

Անկախ մեր առջև ծառացած մարտահրավերներից` կրթական հնարավորությունները պահպանելու հանձնառությունը երբեք չպետք է խաթարվի. ՀՀ նախագահ

22:00 13 Սեպտեմբեր 2024

Հանրապետության նախագահ Վահագն Խաչատուրյան մասնակցել է Միջխորհրդարանական միության երիտասարդ խորհրդարանականների տասներորդ գլոբալ համաժողովի փակման արարողությանը և հանդես է եկել ելույթով:

«Ազգային ժողովի մեծարգո՛ նախագահ,
Օրենսդիր իշխանության հարգելի՛ ներկայացուցիչներ,
Միջխորհրդարանական միության հարգելի՛ նախագահ,
Համաժողովի մասնակիցներ,
Տիկնայք և պարոնայք,

Ուրախ եմ ողջունել ձեզ առաջին անգամ Հայաստանում անցկացվող Միջխորհրդարանական միության երիտասարդ խորհրդարանականների հոբելյանական՝ տասներորդ գլոբալ համաժողովի շրջանակներում: Ավարտին է մոտենում այս ներկայացուցչական միջոցառումը: Կարծում եմ, որ անցած երկու օրերի ընթացքում ունեցել եք հետաքրքիր և բովանդակալից քննարկումներ:

Այսօր Ձեզ եմ դիմում ոգեշնչվելով այն վճռականությամբ, որը ներկայացնում է ձեզանից յուրաքանչյուրը: Դուք` երիտասարդներդ, օժտված եք հզոր ներուժով՝ նպաստելու հասարակության առաջընթացին ու զարգացմանը: Որոշումների կայացմանը ձեր ներգրավվածությունը և առաջնորդելու վճռականությունը կարևոր են առաջադեմ, տոկուն և ներառական հասարակության ձևավորման գործում: Ձեր ձայնը, գաղափարներն ու հավակնոտությունն են ձևավորում մեր ապագան: Որպես երիտասարդ խորհրդարանականներ՝ դուք եզակի հնարավորություն ունեք մատաղ սերնդի ձգտումներն ամրագրելու օրենսդրական ձևաչափում: Այս տեսանկյունից հատկապես կարևորում եմ նման հարթակների առկայությունը, ինչը հնարավորություն է ստեղծում լիարժեք իրացնել առաջնորդության ձգտող երիտասարդների ներուժը: Դուք զգալի պատասխանատվություն եք կրում ձեր սերնդի կարիքներն ու ցանկություններն արտահայտելու գործում: Օգտագործեք այս պատասխանատվությունը խելամտորեն, խիզախորեն և, իհարկե, ազնվորեն:

Ներկա աշխարհում, որը նշանավորվում է աշխարհաքաղաքական գլոբալ փոփոխությունների, տեխնոլոգիաների ու թվային վերաձևակերպումների, սոցիալ-տնտեսական շրջադարձերի, մարտահրավերների ու փորձությունների ներգործությամբ, փոխվում է նաև հասարակական հարաբերությունների դինամիկան և այս համատեքստում, երիտասարդությունը` որպես պետության առանցքային ներուժ, հստակ դերակատարություն ունի: Մարդկային ռեսուրսների որակից է կախված պետական կառավարման համակարգի արդյունավետությունն, ինչն իր հերթին հանգեցնում է տնտեսության բոլոր, այդ թվում սոցիալական ոլորտների արդյունավետության բարձրացմանը։

Կցանկանայի հատկապես կարևորել համաժողովի առանցքային թեմաները՝ կրթությունն ու զբաղվածությունը: Ձեզ եմ դիմում ոչ միայն որպես նախագահ, այլ որպես կրթության, ուսման և աշխատանքի հզոր, փոխակերպող ուժի ջատագով:

Այսօր կրթությունը նախորդ տարիների նման չունի սահմանափակ ռեսուրսներ և չի ճանաչում աշխարհագրական սահմաններ: Գլոբալացված և տեխնոլոգիական առաջընթացի ժամանակահատվածում երիտասարդ սերնդին հասանելի են ամենատարբեր ռեսուրսներ, անսահմանափակ հնարավորություններ:

Տեղեկատվական տեխնոլոգիաների հեղափոխության առանձնահատկություններով պայմանավորված ներկայում ձևավորվել է նոր տնտեսական համակարգ:

Կրթությունը, գիտելիքը, նորարարությունը և հետազոտությունները 21-րդ դարի իրողություններում կայուն տնտեսական աճի և տնտեսությունների մրցունակության բարձրացման անփոխարինելի տարրերն են, ակտիվներն են, որոնց միջոցով կարելի է հաղթահարել ժողովրդագրական և աշխատանքային սահմանափակումները:

Կրթությունն անսահման հնարավորությունների անկյունաքար է, որը կարող է գեներացնել գաղափարներ, մշակել նոր մոտեցումներ, զորացնել անհատներին, խթանել նորարարությունը և տնտեսության շարժիչ ուժն՝ այսօրվա և վաղվա մարտահրավերներին դիմակայելու համար:

Եթե խոսենք Հայաստանի զարգացման ուղղությունների մասին, դա միանշանակ կրթության, գիտության և բարձր տեխնոլոգիաների ուղղվածությունն է: Գիտելիքահեն միջավայրի ձևավորման միջոցով մենք նպատակադրել ենք զարգացնել այնպիսի տնտեսություն, որն աշխարհին պետք է առաջարկի տեխնոլոգիական և նորարարական արտադրանք։

Անկախ մեր առջև ծառացած մարտահրավերներից՝ լինի դա տնտեսական անկում, գլոբալ համաճարակ կամ սոցիալական ցնցում, կրթական հնարավորությունները պահպանելու հանձնառությունը երբեք չպետք է խաթարվի: Այսօրվա աշխարհում, որը հաճախ նշանավորվում է անորոշությամբ, մեր հավաքական պարտականությունն է ապահովել, որ հասարակության հիմնարար սյուները պահպանվեն և ամրապնդվեն անկախ հանգամանքներից:

Հարգելի՛ հյուրեր,

Խոսքիս ավարտին կցանկանայի հույս հայտնել, որ Հայաստանից կհեռանաք դրական հիշողություններով ու տպավորություններով, նոր ծանոթություններով ու նոր էներգիայով՝ ծառայելու ի շահ ձեր երկրների բարգավաճմանը»:

ԿԱՅՔԻ ՀԻՆ ՏԱՐԲԵՐԱԿ

Լրահոս

ՏԵՍՆԵԼ ԱՎԵԼԻՆ

Փոխկապակցված նորություններ

Քաղաքականություն

ՏԵՍՆԵԼ ԱՎԵԼԻՆ