00:32:27 0°C
  • USD - 482.28 ֏
  • EUR - 568.13 ֏
  • RUB - 6.53 ֏
  • Արարատ Զուրաբյանն ԱԺ-ում հիշել է 2008-ի մարտիմեկյան դեպքերը

    07:43 17 Հունվար 2018

    Ազգային ժողովի «Ծառուկյան» խմբակցության անդամ, ՀՀՇ նախկին նախագահ Արարատ Զուրաբյանին այսօր ԱԺ նիստի ժամանակ, երբ քննարկվում է «Ոստիկանության մասին» օրենքում կատարված փոփոխությունները  հետաքրքրում էր, թե ոստիկանությունն ինչպե՞ս է կանոնակարգելու տեսանկարահանող սարքերի օգտագործումը՝ հաշվի առնելով անձի ազատության իրավունքը։

    «Ընդհանրապես, անհատի կյանքին միջամտելը պետք է շատ խիստ կանոնակարգված լինի ու սահմանափակված։ Ես ուզում եմ հասկանալ՝ ինչպես եք նախատեսում դա պահպանել», - հարցը ներկայացնող փոխոստիկանապետ Վարդան Եղիազարյանից հետաքրքրվեց Արարատ Զուրաբյանը։

    Վարդան Եղիազարյանն ասաց, որ միայն ճանապարհային ոստիկանությունը չի օգտագործելու տեսանկարահանող սարքերը, այլ ոստիկանական համակարգում ընդհանրապես։ Նրա խոսքով՝ երեք խումբ տեսահսկող սարքեր կան՝ ճանապարհների վրա արագաչափ սարքերը, քաղաքում տարբեր հատվածներում տեղադրված սարքերը և կլինեն դյուրակիր տեսանկարահանող սարքեր, որոնք կլինեն ոստիկանության ծառայողի ձեռքին կամ հագուստին ամրացված։ Ընդ որում, Եղիազարյանն ասաց, որ անձնական հեռախոսներով ոստիկաններն իրավունք չունեն նկարահանել, այլ միայն տեսանկարահանող սարքով։

    «Ինչ վերաբերում է ձեր մտահոգությանը, ապա Սահմանադրությամբ հստակ ամրագրված է, որ մասնավոր, ընտանեկան, անձնական կյանքի անձեռնմխելիության իրավունքը կարող է սահմանափակվել։ Սա սահմանադրական նորմ է, մենք սահմանափակում ենք օրենքով, բայց միայն այն նպատակով, որը նախանշված է մեր նախագծի մեջ», - ներկայացրեց փոխոստիկանապետը։

    Արձագանքելով պաշտոնյային՝ Զուրաբյանը հիշեցրեց 2008-ի մարտիմեկյան դեպքերը. «Հայտնի իրադարձություններից հետո նախագահ Քոչարյանը հայտարարեց, որ մեքենաների հետևից դուրս էին գալիս մարդիկ, կրակում են, կան բազմաթիվ ձայնագրություններ, նկարահանումներ և այլն, և այլն։ Հետագայում, սակայն, որևէ ձայնագրություն կամ նկարահանում չներկայացվեց։ Ուզում եմ հասկանալ՝ ի՞նչ մակարդակի վրա է դա արվելու՝ քաղաքական հաշվեհարդարի՞, մարդկանց ճնշելո՞ւ, թե՞ մեր հասարակության կյանքը ավելի բարելավելու համար»։

    «Օգտագործվելու են զուտ ոստիկանական գործառույթները իրականացնելու համար, իսկ դրանք միտված են քաղաքացու կյանքը, առողջությունը, գույքը, անձեռնմխելիությունը ապահովելու համար», - ի պատասխան ասաց փոխոստիկանապետը։

    ԿԱՅՔԻ ՀԻՆ ՏԱՐԲԵՐԱԿ

    Լրահոս