«Արմավիայում» կրճատումներ եղել են և կլինեն. ընկերության նախագահ

11:45 23 Հունվար 2012

«Արմավիա» ավիաընկերությունում իրականում կրճատումներ եղել են, կան ու կլինեն,- այս մասին այսօր լրագրողների հետ հանդիպման ժամանակ հայտնեց ավիաընկերության նորանշանակ նախագահ Նորայր Բելլույանը:

Հիշեցնենք, որ Նորայր Բելլույանը մինչ այս երկար տարիներ զբաղեցրել է «Արմավիա» ավիաընկերության գործադիր տնօրենի պաշտոնը, իսկ 2011 թ. դեկտեմբերի 5-ից նշանակվել է «Արմավիա» ավիաընկերության նախագահ:

Գործադիր տնօրենի պաշտոնում, Նորայր Բելլույանին փոխարինում է ավիաընկերության անվտանգության նախկին պետ Արմեն Ազնավուրյանը:

Հարցին, թե ինչո՞վ են պայմանավորված ավիաընկերության աշխատակազմում զգալի թվով կրճատումները, ավիաընկերության նախագահը պատասխանեց.

«Դա կապված է համաշխարհային ճգնաժամի հետ: Հիմա` այս ճգնաժամի ժամանակ, իմաստ չունի պահել 1000 աշխատակցի, եթե, օրինակ, նույն աշխատանքը կարող են իրականացնել 500-ը: Աշխատանքից հեռացվում են նրանք, ովքեր ոչ արդյունավետ են աշխատում: Շատ-շատերն, ովքեր հեռացվում են աշխատանքից, իրենց հաշվին արձակուրդի են ուղարկվում, քանի որ, հնարավոր է, որ ճգնաժամից դուրս գալուց հետո, երբ նոր չվերթներ բացվեն, տվյալ աշխատակիցները կրկին ետ բերվեն»,- պարզաբանեց Բելլույանը:

Նշենք, որ այժմ ավիաընկերությունն ունի 380 աշխատակից:

Հաշվի առնելով նախորդ տարի աշխատավարձների ուշացման դեպքերը, հետաքրքրվեցինք, թե արդյո՞ք աշխատակազմի 20%-ի կրճատման դեպքում աշխատավարձերի ուշացման դեպքերը կբացառվեն, ավիաընկերության նախագահը պատասխանեց.

«Չնչին ուշացումներ, միգուցե կան, բայց հիմնականում` ոչ»:

Անդրադառնալով ավիաընկերության` «Զվարթնոց» օդանավակայանին ունեցած պարտքերին, ինչի պատճառով մի քանի անգամ հետաձգվել են ավիաընկերության չվերթները, Նորայր Բելլույանը նշեց, որ այժմ էլ «Արմավիա»-ն կուտակած պարտքեր ունի.

«Դա նորմալ է բոլոր ավիաընկերությունների համար: Աշխարհում բոլոր ավիաընկերություններն էլ թռնում են պարտքերով, իսկ հետագայում այդ պարտքերը մարվում են»:

Ավիաընկերության նախագահը հերքեց տեղեկությունները, թե իբր «Արմավիա» ավիաընկերության սեփականատեր Միքայել Բաղդասարովը պատրաստվում է վաճառել ավիաընկերությունը Հանրապետության նախագահի դստեր ամուսնուն` Միքայել Մինասյանին:

«Ես գիտեմ, որ սեփականատերն առայժմ միտք չունի վաճառելու ավիաընկերությունը: Ես դրան եմ հավատում, ուրիշ տեղեկություն չունեմ»:

Նորայր Բելլույանը տեղյակ չէր նաև «Երևան Ավիա»-ի մասին:

Նշենք, որ ըստ շրջանառվող լուրերի` ավիաընկերության սեփականատեր Միքայել Բաղդասարովը պատրաստվում է հիմնել նոր ավիաընկերություն` «Երևան Ավիա».

«Կարծում եմ, որ այդպիսի բան չկա, դա իմ կարծիքն է»,- նշեց Բելլույանը:

Հարցին, թե ինչով է պայմանավորված իր նշանակումը ավիաընկերության նախագահի պաշտոնում (հիշեցնենք, որ մինչ այս «Արմավիա»-ի նախագահը Միքայել Բաղդասարովն էր, ով շարունակում է մնալ որպես ավիաընկերության սեփականատեր), պրն. Բելլույանը պատասխանեց. «Ես չեմ կարող բոլոր գործերը միայնակ կատարել, երկաթից չեմ: Դրա համար էլ, հաշվի առնելով այս ամենը, որոշվեց բաժանել պարտականությունները: Հիմա ես` որպես նախագահ, ավելի շատ զբաղվում եմ արտաքին գործերով, իսկ գլխավոր տնօրեն Արմեն Ազնավուրյանը` ներքին կանոնադրական գործերով: Սա արվել է զուտ ավիաընկերության աշխատանքի արդյունավետության բարձրացման համար»:

Խոսելով ավիաընկերության ուղևորահոսքի մասին, Բելլույանը նշեց, որ նախորդ տարի այն կազմել է 700.000, իսկ այս տարի նա հույս հայտնեց, որ կգրանցվի 8-10%-անոց աճ:

ԿԱՅՔԻ ՀԻՆ ՏԱՐԲԵՐԱԿ

Լրահոս

ՏԵՍՆԵԼ ԱՎԵԼԻՆ

«Արմավիայում» կրճատումներ եղել են և կլինեն. ընկերության նախագահ

Լրահոս

Փոխկապակցված նորություններ

Քաղաքականություն

Աշխարհ