12:43:10 13°C
  • USD - 482.28 ֏
  • EUR - 568.13 ֏
  • RUB - 6.53 ֏

    • Մեղրիի քաղաքապետը` Սուրեն Խաչատրյանի մարզպետ նշանակվելու մասին

    13:46 16 Սեպտեմբեր 2014


     Մեղրիի քաղաքապետ Արշավիր Հովհաննիսյանը խոստովանում է, որ Սուրեն Խաչատրյանի հետ աշխատելը շատ հեշտ է, քանի որ նա իր գործի գիտակն է և շատ լավ է պատկերացնում մարզի խնդիրները: Slaq.am-ի հետ զրույցում քաղաքապետը նշեց, որ հենց Սուրեն Խաչատրյանին էլ տեսնում է մարզպետի պաշտոնում:

    -Պարոն Հովհաննիսյան ի՞նչ կարծիք ունեք Սուրեն Խաչատրյանի վերադարձի մասին խոսակցությունների հետ կապված, հաջորդ մարզպետի անունների ցանկում շրջանառվում է նաև նախկին մարզպետի անունը: Կցանկանայի՞ք, որ նա ղեկավարեր Սյունիքի մարզը:

    -Պետք է ասեմ, որ ինձ համար կոնկրետ անձի խնդիրը չէ, որ կարևորվում է, ինձ համար բացարձակ նշանակություն չունի, թե անձն ով կլինի, բայց ինձ համար կա որոշակի ձևաչափ, որի մեջ ես կցանկանայի տեսնել մի մարդու, ով իմ նշած ձևաչափն ապահովվել գիտի: Իմ պատկերացմամբ` Սյունիքի մարզպետի պաշտոնում անհրաժեշտություն կա տեսնել մի մարդու, ով ունի մարտական ոգի և դաստիարակություն, որը շատ կարևոր է Սյունիքի մարզի համար: Կուզենամ տեսնել մի մարդու, ով գործի շատ լավ կազմակերպիչ է, գերազանց կարող է իմանալ Սյունիքի մարզը և նաև շատ լավ պետք է պատկերացնի մարզի ողջ տնտեսությունը: Այդպիսի մարդ ես գիտեմ Խաչատրյան Սուրենին, ահա թե ինչի համար և ինչով է պայմանավորված, որ ես նրան ցանկանում եմ տեսնել որպես մարզպետ:

    -Արդյո՞ք Ձեզ մոտ ստորագրահավաք է կազմակերպվել Սուրեն Խաչատրյանի վերադարձի հետ կապված:

    -Ես ընդամենը 10 րոպե է, որ Մեղրիում եմ ու արդեն որոշակի տեղեկություններ ունեմ, որ ստորագրահավաք է արվում: Իմ մասնակցությունը ստորագրահավաքին ընդամենը լինելու է քաղաքացու տեսքով, որովհետև դա ինքնաբուխ նախաձեռնություն է: Այստեղ մնում է միայն իմ անձի մասնակցությունը, իսկ ինչ վերաբերվում է իմ կարծիքին, ապա ես այն արտահայտեցի և անպայման կստորագրեմ:

    -Ասում են վախի մթնոլորտ կա քաղաքում, որ Սուրեն Խաչատրյանը կոպիտ է և այլն, և այլն: Կա՞ նման բան:

    -Մոտ 10 տարի Սուրեն Խաչատրյանն աշխատել է մարզպետի պաշտոնում և յուրաքանչյուր այցելություն Մեղրի պայմանավորված է եղել քաղաքի տնտեսական ինչ-որ մի ոլորտի զարգացման կամ քաղաքի որոշակի հիմնախնդիրներին լուծում տալով և շատ տարօրինակ է և նաև զարմանալի, որ մեղրեցին պետք է վախենա մի մարդուց, որը յուրաքանչյուր անգամ գալիս է իր քաղաքը և լուծում որոշակի տնտեսական խնդիրներ: Ինձ համար տարօրինակ է նման բան լսելը:

    -Այդ դեպքերը հաճախ կապվում է Բուդաղյանների գործի հետ:

    -  Ես կարծում եմ, որ այդ հարցի պատասխանը պետք է լսեք ոչ թե Մեղրիի քաղաքապետից կամ որևէ քաղաքապետից, փառքն Աստծուն, որ մենք Հայաստանում ունենք շատ կայացած և շատ առողջ դատաիրավական մի ամբողջ համակարգ: Կարծում եմ, որ պատասխանները պետք է լսեք նրանց աշխատակիցներից և երևի թե արդեն լսել եք:

    -Ամբողջացնելով Ձեր խոսքը նշված հարցի հետ կապված կարո՞ղ ենք ասել, որ վախի մթնոլորտ ասելը հիմնազուրկ է:

    -Անպայման: Մեղրիում ոչ թե միայն վախի մթնոլորտը չկա, Մեղրիում Սուրեն Խաչատրյանը որպես առանձին անհատ շատ ընդունված անձնավորություն է:

    -Ասում են նաև, որ Սուրեն Խաչատրյանն ունի շատ կոպիտ բնավորություն:

    -Ես հայոց լեզվի մասնագետ չեմ, ես բանասեր չեմ, բայց եթե կոպիտ բառը նայենք երևի դրա հոմանիշ բառը կարող է լինել կոշտ: Կարծում եմ, որ այս տերմիններով չէ, որ պետք է բնութագրվի Սուրեն Խաչատրյանը: Ես ավելի ճիշտ տերմին կարող եմ օգտագործել, որ ուրիշ մարդիկ չեն ուզում օգտագործել՝ Սուրեն Խաչատրյանն իր գործի նկատմամբ խստապահանջ և հետևողական մարդ է: Նաև նոր բան չեմ ասի, որ նշեմ, որ յուրաքանչյուր աշխատասեր մարդ օժտված է նման հատկությամբ, նաև սիրում է հետևել իր աշխատանքին ու խստություն ունի այդ աշխատանքի նկատմամբ և շատ եմ ցանկանում, որ մարզպետն ունենա այդպիսի հատկություն և չէր խանգարի, որ յուրաքանչյուր հիմնարկի ղեկավար, նույնիսկ յուրաքանչյուր հայ ընտանիքի ղեկավար լիներ խստապահանջ և հետևողական:

    -Որպես քաղաքապետ դժվար չէ՞ր աշխատել նման մարզպետի հետ:

    -Իհարկե ոչ, նույնիսկ շատ ավելի հեշտ: Իմիջայլոց ասեմ, որ Սուրեն Խաչատրյանը շատ արագ կողմորոշվելու հատկություն ունի և նաև իր անձով պայմանավորված հզորությունը հեշտացնում էր նաև իմ աշխատանքը: Ես շատ հեշտ եմ աշխատել Սուրեն Խաչատրյանի հետ:

     

    ԿԱՅՔԻ ՀԻՆ ՏԱՐԲԵՐԱԿ

    Լրահոս

    ՏԵՍՆԵԼ ԱՎԵԼԻՆ

    Փոխկապակցված նորություններ

    Միջազգային լուրեր

    ՏԵՍՆԵԼ ԱՎԵԼԻՆ

    Տնտեսություն

    ՏԵՍՆԵԼ ԱՎԵԼԻՆ
    Կայքի քարտեզ
    SLAQ.am || 2009-2023 . Բոլոր իրավունքնրը պաշտպանված են։
    Նախագծող՝ Studio One