22:47:49 18°C
  • USD - 482.28 ֏
  • EUR - 568.13 ֏
  • RUB - 6.53 ֏
  • «ՆԳ նախարարն ինչ-որ անհասկանալի անհրաժեշտությունների է հղում անում». Արսեն Թորոսյանի համար տարօրինակ է՝ ինչո՞ւ չեն տուգանում խախտում արած պաշտոնյաներին

    11:10 28 Փետրվար 2024

    ԱԺ «Քաղաքացիական պայմանագիր» խմբակցության պատգամավոր Արսեն Թորոսյանի գնահատմամբ՝ կարմիր-կապույտ առկայծող փարոսիկների՝ տարբեր պաշտոնյաների կողմից ապօրինի օգտագործման հարցը բարձրացնելուց հետո իրավիճակը գրեթե չի փոխվել:

    «Անձնապես ինձ ԿԲ նախագահը տեղեկացրել է, որ իր մեքենան համապատասխանեցվել է օրենքին, ինչը գովելի հանգամանք է, բայց ես այդպես էլ ՆԳՆ-ից չեմ ստացել պատասխան իմ պաշտոնական գրությանը, թե ինչու վարչական պատասխանատվություն չի կիրառվում օրենքը խախտողների նկատմամբ»,- Facebook-ում գրել է Թորոսյանը։

    Ըստ նրա՝ տարօրինակ էր տեսանյութում ՆԳ նախարարի պատասխանը, ըստ որի՝ «անհրաժեշտությունից ելնելով դրանք կարող են օգտագործվել» (նշվեց դեպքի վայր հասնելու մասին):

    «Փաստորեն, պատգամավորներն էլ ԱԺ նիստից չուշանալու անհրաժեշտությունից ելնելով կարող են օգտագործել դրանք, որպեսզի քվորումի խնդիր չառաջանա և երկրի օրենսդրական գործունեությունը չխաթարվի։ Ցավալի է, որ նախարարը, որը պետք է խիստ հանձնարարի, որ օրենքը պահպանվի, ինչ-որ անհասկանալի անհրաժեշտությունների է հղում անում։

    Կրկնակի ցավալի է, որ օրենքը խախտող պաշտոնյաներն էլ շարունակում են խախտել այն՝ մեծամասամբ լինելով պաշտոնյաներ, որոնք պետք է ապահովեն օրենքների պահպանությունը։

    Հ.Գ. Ես իմ մեքենային փարոսիկ չեմ դրել և չեմ դնելու, որովհետև չեմ պատրաստվում օրենք խախտել։ Իմ հրապարակային հայտարարությունը պետք է փոխաբերական իմաստով հասկանալ, որ ոչ ոք իրավունք չունի խախտել օրենքը, բայց եթե դրա վրա ոստիկանությունը միտումնավոր աչք է փակում, ապա ինչպես է մյուսներից պահանջելու դրա կամ ՃԵԿ այլ կանոնների պահպանումը»,- նշել է Թորոսյանը։

     

     

    skype sharing button

    pinterest sharing button

    sharethis sharing button

    ԿԱՅՔԻ ՀԻՆ ՏԱՐԲԵՐԱԿ

    Լրահոս